La Paz, 13 junio — Aka qullasuyu markasanxa kunaymana chiqanakanwa wakichapxi willkana kutjanitapa amt’añataki, ukaruxa machaqa mara ukhama sutiñchapxi. Jichhamaraxa phisqha waranqa phisqha pataka pä tunka phisqhani maranakawa katuqataxani sasinawa amaut’anakaxa ch’amanchapxi . Uka amtawinakxa chiqasa kunatixa uka wak’ani chiqanakanwa wakt’ayapxi katuqañataki. Ukhamarakiwa kunapachatixa willkaxa nayraqata mistsuni ukhaxa qamasa, ch’amawa katuqaña sasina amparanaka aptapxi. Ukatxa kunaymana waxt’anakampi, luqtanakampi astanakampiwa katuqapjixa.
Uka willka kutixa saña muniwa willkaxa kut’anitapa. Ukhamaxa pachaxa mayjt’iwa sasinawa qhananchapxi. Ukaxa janira willkaxa kut’anki ukhaxa uruxa jisk’akichispaya ukatxa kunapachatixa willkaxa kut’anxi ukhata nayraruxa uruxa jayaxchispaya ukhama yatiyapxi..
Ukatsti kunaymana chiqanakanwa aka urunakanxa Departamento de La Paz tuqinxa: Tihuanaku, Caquiaviri, Viacha, Jesus de Machaca juk’ampi chiqanakana katuqapxi. Ukhamarakiwa aka urunakanxa kunaymana amtawinaka chikañchayapxi ukaxa kirkt’awinakasa, thuqt’awinakasa uñacht’ayasina kikiparaki piqutanaka jalanaqt’ayasina ukharuxa maransa maykuti qhathu wakicht’asina. Aksa tuqitxa Jilata amaut’a Basilio Ticona Villca sarakiwa: willkaxa kutjanisinxa ch’amapampiwa ch’amnchistu ukatawa ukhama thuqt’awinakasampisa katuqataxa”.
QILLQIRI MARY TUCO