El Alto, 5 Junio (EAN).-Aka qhiphariri kurmuru uruna (sábado) kimsa urunaka maykipkipana aka mara t’aqa (junio) phaxsinxa, aka markasanxa kunaymana Escuelas Superiores sata jach’a yatiqaña utanakanxa, walja yatichirinakawa yatxatawinaka tukxatawayapxi. Uka yatxatawixa Programa de Fromaciòn de Maestras ukhamaraki Maestros tuqiwa utjawayi. Jichhaxa uka tukt’ayiri yatichirinakaxa mama uka kipkaraki tata kamayunakajapxiwa. Jupanakaxa machaqa kamachi yatichawi yatiqawina utji, Avlrino Siñani Elizardo Perez satakisa, uka tuqita yatxatawayapxi ukhamana yatichawina phuqhayañataki.
Ukampisa aka tuqixa yatichirinakaxa aka machaqa kamachi amtawinaka yatichawina phuqhayañatakiwa ch’amancht’awayapxi. Ukasti lurawina ukhamaraki amta phuqhawinakana, taqi ukanakaxa jani qillqatanaka armasina. Ukatxa jupanakaxa tukt’ayasinxa ma lurawi (producto) uñacht’awayapxi.
Escuela Superior de Formación de Maestros El Alto markankiri jach’a yatiqaña utatxa ukhamarakiwa niya mä waranqa pä pataka yatichirinakawa chiqasa tukt’awayapxi. Aksa tuqitxa Kullaka kamayu, uka jach’a yatiqaña utana irpiri, Jhanet Apaza directora general a.i. jupaxa sawayiwa: “ Ukhama yatxatasinxa uka yatichirinakaxa aka markasana yatichawi yatiqawiruwa ch’ullqhiñchapxani yatichawina machaqa kamachi thakhiñchasina”
QILLQIRI: MARY TUCO