La Paz, 9 Mayo — Departamento de La Paz suyu Pacajes marka Jayuma Llallagua sata tuqinxa nayra maranakatpachawa jayu luraña yatipxi. Aka tuqinxa umaxa mä chiqanxa wali k’arawa ukawjatawa jayuxa apsuta.
Aka tuqina qamasirinakaxa jayu lurañatakixa nayraqataxa uka k’ara uma tanthapipxi ukharuxa, suma janq’uki jayuxa wañt’añapatakixa, k’achañatawa uka juri uma k’ilaptañapkama pachpa umapi jarst’apxi, ukhama jarsusinxa uma ch’umsuñapatakixa mä chiqarukiwa thamthapipxi. Ukhatxa moldes satakisa ukaru tupt’asinwa niya kimsa phaxsinakawa lupìru uskt’apxi sumana wañt’asina tikt’añapataki.
Jilata Francisco Rojas Yujra jupaxa jiliri mallku ukhamawa marka Jayuma Llallagua tuqina. Jupaxa qhananchawayiwa aka urunakamaxa uka jayuxa Chukiagu markana ukhamaraki Beni tuqina uka walja waka uywanaka uywirinakaru alxatatapa.
Ukampisa Francisco Rojas Yujra jilataxa irpirjamaxa mayiwayiwa aka jayu alxañatakixa kunaymana qhathunaka utjañapataki markasana irpirinakaxa yanapt’apxañapa.
Mary Tuco / EAN Aymara