La Paz, 24 Jun. — Pä tunka pusini urunaka maykipkipana mara t’aqa (junio) phaxsinxa San Juan uruwa amtata. Aka urunxa kunaymana amtawinakawa phuqhayata utji. Jach’a markanakanxa pä tunka kimsani urunaka maykipkipana mara t’aqa (junio) phaxsita arumtuqiruxa walipuniwa San Juan ururu karuqañatakixa q’uxu, q’uxunakampi, muxsa umanaka umxatasina, salchichas satakisa manq’asinsa suyataxa. Ukampisa nayriri maranakanxa aka arumanxa chiqasa wali thaya arumawa sasinxa mä wawaru tukt’asina qamarañatakixa phichhasipxirinwa ukasti llakinaka phichharpayañani sasina, jichhaxa ukanakaxa turkawayiwa kunatixa Pachamama ukhamaraki q’uma samana utjañapatakiwa irnaqaña sasinawa amtataxa.
Ukañkamaxa ayllunakansa ukhamaraki markanakansa San Juan uru katuqañataki arumaxa janiwa kunasa ukhama wakichata utjkiti. Ukampisa San Juan uruxa chiqasa janira willka mistsunkipana umampi jarisiña phuqhapxi, ukasati kunaymana usunakata qullasiñataki. Aka amtaxa biblia tuqina qillqatata juti ukasti San Juan tatataxa kunapachati bautizo katuqana ukhaxa ajayu tuqiwa k’umaraxana. Janiwa ukakikiti jani ukasti suertsa qhurita, k’anwampita cervezampita ukhamaraki ch’uqitsa uñasipxiwa, kunjamasa saristani ukata yatisiñataki.. Ukhama yatisiñaxa wakiskiriwa jani walinakata jark’aqasiñataki ukhama aymaranakaxa amuyapjixa.
Aksa tuqitxa jilata Mario Herrera suyu Los Andes tuqinkirixa amuyiwa: “ aka urunakanxa San Juan uruxa qullqinitakiwa tukuyata, kunatixa taqi kunasa alxañakiwa utjaski. Jani qullqinikasti janiwa uka amtawinakampixa sarantapkitixa, ukhamaxa janiwa pisina jakiritakikiti”
EAN aymara / MT