La Paz, 24 Mayo — Qullasuyu markasanxa departamento de La Paz markawa chikachasi. Aka markanxa pä tunka suyunakawa utjixa uka taypinakanxa kunaymana achunakawa achuyataxa. Jichhurunakamaxa uka achunakxa janiwa yapuchirinakaxa kawkharu alxañsa yatipkanti, ukhama irpirinakapaxa qhananchawayapxi. Ukhamakipanxa amtawayapxiwa, nayriri qhathu phuqhayawayapkipana mercado Santa Rosa tuqina, sapa urururunaka (viernes) ukhamaraki kurmururunaka (sabado) uka Santa Rosa alxaña utana qhathu phuqhayaña. Aka alxaña uta “mercado campesino Santa Rosa” sutiñchataxa El Alto markana zona Santa Rosa tuqina jikxatasi .
Uka qhathunxa utjchispaya alxañataki kunaymana achunaka ukasti: juyranaka, ch’uxña achunaka, muxsa achunaka, kawkirinakatixa pä tunka suyunakana yapuchatanaka. Ukampisa yapuchirita manq’añataki alasirinakaru chiqapa alxatachiniya ukhama uka tuqina irpirinakaxa yatiyawayapxi.
Aksa tuqitxa kullaka Graciela Villca ejecutiva aka Federación Departamental de Mujeres Indígenas Originarias Campesinas Bartolina Sisa La Paz tuqina irpirixa jawillt’awayiwa akhama arunakampi: “ taqi kullakanaka, jilanaka purt’apxañani uka qhathuru kawkitixa aka pä tunka suxtani ukhamaraki pä tunka paqallquni urunaka llamayu (mayo) phaxsita maykipkipana qallaratani Mercado Santa Rosa tuqina achunaka alxaña . Ukaxa sapa urururunaka (viernes) ukhamaraki kurmururunakawa (sabado) aljatanixa, purt’aniwayapxama uka manq’añanakana chanipaxa iraqt’ataniwa”.
Mary Tuco / EAN Aymara